İy dost bu nice kîl ü kâl maksûd bir haber-durur
Ya dahı nice cüst ü cû görene bir nazar-durur
Taglar aşup berye geçüp ırak yire emek çeküp
İstedügün bunda-y-iken bu ne aceb sefer-durur
Hîç kılmagıl ırak sefer ömür geçer ecel irer
Dost bundadur halvet sever ne galaba haşar-durur
Hîç ırag isteme anı cânundan içerü cânı
Senünle biledür anı görmemek bî-basar-durur
Cânundan ol dahı yakın key edeb bekle key sakın
Bilürisen dostlık hakın dâyim sana ol yar-durur
Dilün eydür Çalap hâzır pes kulagın niçün sagır
Sen senün sözüne münkir vallah bu iş hatar-durur
Sen uyursun ol uyanık eksügüni bilgil bayık
Daha niçe bulam tanuk müdam sana ol yâr-durur
Mescid ü medrese sende sen dört yana perâkende
Ne kaldın sen bu erkanda işün katı düşvâr-durur
Tevhîd tonını giyen varlıgını yoga sayan
İşbu yola kâyim turan mutlak bilün ol er-durur
Sen anı eyle bilicek ol dirligi dirilicek
Gözün hicâbın silicek yir gök tolu dîdâr-durur
Yunus derd-ile girüben ışkun yolunda dem-be-dem
Varlıgın yoga sayıban ma’şûka intizâr-durur